نعم لمحاكمة عسكر العمال


محاكمه وعسكريه طب بأمارة إيه .. أحالت النيابه العسكريه ثمانية عمال بمصنع 99 حلوان للصناعات الهندسيه بشوية تهم كده من إللى يحبها قلبك وتودي ورا ورا ورا الشمس وكل تمهة الغلابه دول إنهم أحتجوا لما زميلهم مات وأتصاب 6 أخرين في أنفجار غلايه داخل المصنع

طيب ياعم العسكر دول مدنين بتحاكمهم أنت أزاي ثم إن أي محاكمه حتكون برعايتك وأنت مافيش عندك أي ضمانه أو حرية قضاء

وكمان قولي بأي صفة تدي نفسك صفة العسكر أنت مش عسكر ما أنت رميت سلاح العسكر من زمان وبقيت بتصنع سخانات وفيديوهات هات لي دليل واحد إنك عسكر

يا حضرة الظابط يا إللى حتمضى ع القرار قبل ما تنطقه المحكمه المتحكمه أنت باطل وإللى جابك باطل وإللى إداك حق حبس عامل فقير ضعيف بيطالب بحقه برضو باطل

لا للمحاكمات العسكريه للعمال
نعم لمحاكمة عسكر العمال

Advertisements

توقيعات التغيير رايحه ع فين


هو البرادعى فين ؟؟

ماعتقدش إنه فى مصر وشكله بقاله فتره مش هنا !

ياعم أثبت بقى كسفتنا قدام النظام

تعال أقعد هنا شويه بقي الله يخرب بيت مبارك

كداب إللى يقول إن أكبر رأس وأتخن واحد فى الجمعيه الوطنيه يقدر يعمل نص إللى إنتا ممكن تعمله

ياريس الناس حاباك أنتا وعايزه تشوفك أنتا !

أحنا طهقنا من وشوش النخبه وكلامهم والناس عايزه تشوفك أنتا جمبها والشباب محتاج تشجيعك وتضامنك معاه

عارف حتقولى إلتزامات وجامعات وتكريمات وكدهون

ياريس خلى مصر ألتزامك الأول الفتره دى وأشتغل هنا شويه

وأعتزر للناس بره بإن عندك بلد بتغيير فيها ومحتجاك .. وقتها الناس دى حتدعمك أكتر وحيقفوا معاك

إنما بالشكل ده مش حتكسب لا بره ولا جوه “_”
توقيع بردعاوى أصيل
==============================
الأخوان والتوقيعات ..

غلطان إللى شايف إن الأخوان قدموا ولو 5% من قوتهم لحد دلوقتى فى جمع التوقيعات

لحد دلوقتى جمع التوقيعات داخل الأخوان بيتم فقط بالنسبه للأخوه المتواجدين على النت ومش كلهم كمان ده نسبه مش كبيره منهم

لسه محدش جمع توقيعات بخط اليد أو لسه مبدؤش يجمعوا ع الأقل أرقام بطايق الغير موجودين ع النت عشان يوقعولهم

ده غير إننا فى فترة أجازه ومافيش شغل طلبه

أصبروا تفتح الجامعات وحتشوفوا شغل طلبة الأخوان

حيجمعوا قد ما تم جمعه خلال الفتره إللى فاتت كلها فى يوم واحد

ده كله متوقف عن مدى جدية الأخوان فى جمع التوقيعات
==============================‏
حملات جمال مبارك والتوقيعات ..

مش حتكلم لا عن حملة مصر كبيره عليك ولا بعيده عن شنبك ولا الهيصه دى

وطبيعى مأقصدش هبل الكردى بتاع توقيعات من أجل جمال مبارك ده راجل دماغه مفوته ومريحه خالص “_”

بس هنا بقى حنستفيد بقى من فوتان دماغه ده

السته أبريلين نفذوا معانا الخطه دى قبل كده

كنا وأحنا نازلين نوزع منشور ولا حاجه كنا بنصور ورق أعلان أى حاجه أفتتاح صيدلية سوبرماركت وإنشالله ورشة ميكانيكى ونخليه معانا ونوزع المنشور عادى وإن كبس البوكس والتشريفه الأمنيه نوريله ورق الأعلانات ونخبى ورق المنشورات ف النص وهو مش بياخد باله وكدهون وبتعدى

إوم إيه بقى حنستخدم ده فى التوقيعات كل واحد يصور كام ورقه هبله من بتوع جمال مبارك يمشى بيهم

ويجمع توقيعات للبرادعى براحته وإن كبس البوكس تانى يوريله بتوع جمال ومش بعيد الظابط يوقفلك عسكرى حراسه جنبك عشان يساعدك ف التوقيعات أو تمضى الظابط ع توقيع التغيير كأنه بتاع جمال .. ماتخافش كلهم حمير ومش حيعرفوا يميزوا بين الأتنين .

مصر كبيره عليك ياجمال شوفلك توك توك إللعب بيه

http://www.myegyptsun.com/forum/attachment.php?attachmentid=16431&stc=1&d=1273409309


مصر كبيره عليك ياجمال شوفلك توك توك إللعب بيه

كنت كتبت نفس عنوان البوست ده من سنه بالظبط تقريبا بعد أغنية ليه مايحكمش إللى غناها شخص يقال إنه مطرب شعبى كان أسمه مش فاكر سيد حاجه كده …

عزيزى .. لا لا لا عزيزى إيه بس !!

صديقى .. تؤتؤتؤ ده مايتصدقش أبدا !!

أخى الفاضل .. لا ده أخواتى يقتلونى فيها لو شبهته بيهم وأصلا هو مش فاضل

بص يا أسطى جمال …

مصر كبيره عليك يا أسطى ماتنفعش لعبه من اللعب إللى كان بيشتريهالك بابا حسنى وأنت صغير أينعم التكاتك ماكنتش طلعت على أيام طفولتك يا دلوعة عين ماما سوزى بس أكيد كان بيجيبلك طايرات لعبه بقى بحكم كونه طيار وكده وتلاقيه كان نفسه يطلعك طيار ولا لواء ولا حاجه كده بس خيبت أمله فى الكشف الطبى ومالقيلكش واسطه ولا مياياه ولا مياياه وخمسين يدخلك بيها شرطه وحربيه ودفاع جوى

بص يا سيدى ولا سيدك إلا أنا

أنت راجل تجارى وتفهمها وهى طايره وتحسبها بالسحتوت “ع فكره من زمان نفسى أعرف معنى سحتوت” والتجاريين إللى زيك بيكسبوها وبيجبوها من بق الأسد وأحيا من حته تانى كده مافيش داعى هى فين وأنت عملت ده كتير فى ديون مصر إللى أشتريت وبعت فيها لحد ما خربتها وضاعفت ديون البلد أضعاف أضعافها

وعشان كده يا أبو الجماجم جيمى باشا أنت تسيبك من حوار التوريث ده وتمسك مكان أبوك ده ياعم مشاكله كتيره وأديك شايف إللى صاب أبوك من وراه لا قادر يمشى ولا يقوم ولا يأكل ولا يشرب والناس كرهته وكرهة البركه من ورا أسمه وكمان خسر أخرته وأحنا خايفين عليك إنت راجل طرئ وأخرتك فى النار وحشه وأنا سامع إن أبو لهب كان بيمشى مشى بطال وأنت مش حتستحمل مجاورته فى النار

ف طلع الحكايه دى من دماغك ولا تسمعش زن إمك ومراتك دول بيلقوك ف التهلكه يا حاج وأنت مش واخد بالك

وما تخافش ياسيدى إحنا مش حنسيبك كده إنتا حتبقى راجلنا برضو وتهمنا مصلحتك

حنرخصلك توك توك مخصوص ليك وحدك وفين يا باشا فى شارع الهرم يعنى حتتبسط وحتعملهم هناك أخر حلاوة تجيب مزه للكباريه ده تجيب سياح تجيب عرب تروح مصريين وحتعيش أبهه بجد لا تقولى مريسه ولا كلام فاضى

اللهم إلا لو الأخوان حكموا بقى فحيقفلوا شارع الهرم ده وحيغيروا إسمه لشارع الحرم ويبنوه كله مساجد بس قشطه حتعيش برضو إبقى هات مصليين وأنقلهم بقى أو أشتغل بيه خط رمسيس أبو الهول وأنقل فراعنة وحيدوك بالصرمه قصدى بالعمله الصعبه

بس أهم حاجه أهم حاجه أهم حاجه تطلع من دماغك فكرة حكم البلد دى عشان هى كبيره عليك

البلد عايزه راجل يصلحها مش يكمل خرابها

مطلوب إعلانات تلفزيونيه لجمع توقيعات للجمعية الوطنية للتغيير

كتير جدا مننا من ضمن إيمانه بالبرادعى وإلتفافه حوله إننا كنا مستنين منه أفكار جديده وخطط عمل وإنتشار وشغل أعلامى كبير إستغلالا لمكانة البرادعى الدوليه .. مش حقول إن ده مجابش نتيجه بس هو أصلا محصلش بالشكل إللى كنا بنتوقعه ومنتظرينه .

بعدما البرادعى رجع وأعلن إنشاء الجمعيه الوطنية للتغيير إتقال كلام كتير عن إنشاء قناة فضائيه بأكتتاب عام ومساهمه مصريه فرحنا جدا بكده وقولنا أهو لقينا حاجه ننفذ منها للناس ونوصلهم وكمان الفرحه شطحت بناس لدرجة إنهم أعلنوا تسمية القناه بالمحروسه وقالوا إنه بدؤا بالفعل فى تحركات إنشائها ..

مافيش أسبوع وهدوا الحلم قالك أدارة النايل سات ووزارة الأعلام فى مصر مش حتوافق على قرار إنشائها وكمان مش حيدوها تصاريح عمل فى الشارع حتى لو أسست وأنشئت خارج مصر وفعلا لو كانت إنشئت خارج مصر ماكنش حيبقى فيه أى نوع من التفاعليه مع المواطن هنا

قلنا طب أعملولنا راديو إف إم ومش حيتكلف إتنين فى الميه من تكلفة قناة فضائيه قالك برضو وزارة الأعلام وأتحاد الأذاعة والتى فى والشركة إللى بتدير إف إم تقريبا بتاعت عماد أديب أخو عمرو مش حيوافقوا ومش حيدونا نطاق للأرسال ..

ده حتى محدش فكر يتعمل راديو إلكترونى كبير وضخم وعلى مستوى عالى يوجه لخدمة الجمعية والمعارضه عموما ويكون ليه دور أخبارى وسياسى وكمان دور ترفيهى لجذب الشباب والناس

لا وإيه بقى .. البرادعى جه يزاحمنا فى وسائلنا الصغيره وبلطج على تويتر والمصيبه إنه أكتفى بيه وسكت .. أينعم أنا بعشق تجربته لتويتر وإنه أضاف لتويتر مصر إضافه غير مسبوقه ومحدش قدر أو حيقدر يكررها بس ده المفروض مايكونش المنتهى

ندخل فى البوست بقى وده المهم

ليه مايكونش فيه إعلانات تلفزيونيه من أجل حث الناس للتوقيع والألتفاف حول الجمعيه الوطينه للتغيير والمطالب السبعه ؟؟!

كمان ليه مافيش أعلانات فى الجرائد والمجلات لدفع الناس على التوقيع ؟!

يعنى وإحنا بنشوف حصاد اليوم ع الجزيره يطلع علينا كده البرادعى وأتنين تلاته من السياسين المحترمين والشخصيات المشهوره إللى أيدت المطالب ووقعت كفنانين وكدهون يعرضوا المطالب السبعه فى السريع ويشجعوا الناس على التوقيع ويقولهم على مواقع التوقيعات وأرقام مسئولى الجمعيه فى المحافظات تظهر فى أخر الأعلان كدهون زى أعلانات كرمبو والمسابقات ^_^ .

وأعلانات فى الصحف المحترمه “حتى عشان تعمل تخفيض للأعلان” بأللوان جذابه وكلام بسيط وبيانات التوقيع وإديها توقيع يا مواطن

مع توضيح إن ده عمل وطنى حر ومافيش أى مسئوليه قانونيه ضده وإنه بيتم بسرية لبيانات الموقع على المطالب

كده حتجذب حتى إللى مالوش فى الأنترنت إنه يدور ويوقع

طيب نيجى للمشاكل إللى حتواجه الأعلانات دى وحتقف ضدها

مبدئيا كل القنوات المصريه الحكوميه حترفض نشر الأعلان .. مش مهم هى قنوات فاشله أصلا وجمهورها أصبح ضئيل جدا

بالنسبه للقنوات المصريه الخاصه بعضها ممكن يوافق والبعض الأخر لا وكده كده حنجرس أى قناه ترفض عرض الأعلان ونفضح مصداقيتهم الفشنك

المشكله الأكبر بقى .. تمويل الأعلانات

هى مشكله كبيره بس سهل حلها .. إزاى أقولك

طبعا مش حنمولها من فريدوم ولا فريدريش نياهاهاههه

أكيد حتكون من فلوس وطنية خالصه

تتجمع أزاى بقى .. تتعمل أشتراكات بقيمه معينه من الأعضاء بالجمعيه والمحافظات وتتجمع تبرعات الأعضاء الكبار “إللى دافنين كتير تحت البلاطه” وده المفروض يكون بطريقه سريه بقى عشان مش حينفع تتجمع تبرعات بطريقه علنيه قانونا لأن الجمعيه مش رسميه .

وطبعا ماننساش إن المفروض البرادعى يساهم بدور كبير فى كده حتى إنشالله يبيع بيته الريفى فى باريس ^_^

وأهو حيبقى قدامنا الجزيره تقدملنا أسعار كويسه بدل ماهى مافيش عندها غير إعلانات كافاك وبتروليم كده

ونظبط حسن راتب فى كام أعلان كده ولا حيندل كعادته بقى

وماننساس إن الأخوان فى اللعبه ودولا فلوسهم أكتر من الرز إللى بياكله المصريين من سبعين سنه فاتت -ربنا يزيد ويبارك- أحنا مابنحسدش فدورهم بقى يشاركوا وكدهون

كنت ناسى أحط حتة الأخوان دى وفكرنى بيها أبو فوده الأخوانى

حقوق الأنسان فى مصر القديمة


برغم إن جدودى مش فراعنه أنا راجل إبن قبيله عربيه أتت لمصر مع الفتح الأسلامى ليها ومازلت بحمل إسم المكان الأشرف على وجه الأرض “مكه” وجدى الأكبر مكى .

بس أنا مصرى وإبن مصرى وجدى مصرى وبتشرف إنى أصبحت خليفة الفراعنه فى البلد دى

بحزن قوى لما بشوف تهجم المصريين بدرايه أو بدون على المصريين القدماء “الفراعنه” وبتضايق لما بيتوصفوا بإنهم كانوا جبابره ووحوش ومعندهمش رحمه

بالعكس قدماء المصريين كانوا أول من أسسوا قواعد حقوق الأنسان وأحترام إنسانية الفرد

أينعم مافيش حاكم أو عهد جه بعدهم مشى على نفس الخطى بس يكفينا إن سكان مصر كانوا أول من أسس ثقافة حقوق الأنسان فى وقت كانت باقى الحضارات “ده إن صح تسميتها حضارات لأن ما كانت تنتهكه من حقوق الأنسان فيها يجعلها فقط غابات” كانت باقى الحضارات تتنافس فى إغتيال هذه الحقوق .

ومن هنا حابب أوضح شوية حقائق تجعلنا نفخر بأجدادنا -طب نقول أجدادكو- القدماء

ومابنساش أبدا فضل الدكتور محمود سلام زناتى أكتر حد حببنى فى الفراعنه ووصحلى حقيقتهم
كفاية إن الفراعنه قدسوا “ماعت” وأختصروا حقوق الأنسان فيها وكانت تعنى العدل ، الحق ، الصدق

حتكلم فى الموضوع ده على أجزاء حسب تقسيمات حقوق الأنسان عند المصريين القدماء

أولا : الحق فى الحياه

كان المصريين القدماء بيحترموا حق الأنسان فى الحياه بشده وأحاطوا حقه فى الحياه بضمانات كتيره منها عقوبات رادعه لأى مساس بجسد الأنسان وكان القصاص هو العقوبه الأكثر إنتشارا وفرضوا عقوبة الأعدام على كل من يسلب حق إنسان فى الحياه

وعلى الجانب الأخر أحاطو تنفيذ عقوبة الأعدام بضمانات لحماية روح المحكوم عليه بها وكانت قضايا القتل تنظر أمام كبير الكهنة وكان لازم موافقة الملك لتنفيذ حكم الأعدام والتنفيذ كان بيتم بوسائل لا تؤدى لتعذيب أو إرقاق المحكوم عليه به

كان أيضا بيتم أستثناء النساء الحوامل المحكوم عليهم بالأعدام من التنفيذ وإرجاء التنفيذ لحين وضع المولود وبعد فترة إرضاعه كمان

وفى سبيل توفير سبل صحيه للأنسان لحماية حقه فى الحياه كان العلاج فى مصر القديمه مجانى بالكامل وعلى نفقة الدوله حيث كان الأطباء يتقاضون أجورهم من الدوله

وحتى الجنين حظى بأحترام كامل لحقه فى الحياه وكان يعاقب من يسلبه هذا الحق نفس العقاب لو أنه قتل رجلا كبيرا

وبالنسبة للمواليد كان يحظر قتل المواليد أو وأدهم وكان ينبذ من المجتمع من يفعل ذلك فى الوقت إللى كان يشاع فى الدوله الرومانيه وأد الأناث لأن الأب كان ينتظر أن يأتى له فقط إبنا ولد حتى يكون فارسا يشارك فى الجيش ويعلى شأنه

وكانوا فى الدوله الأغريقيه يمارسوا أبشع الطرق فى إنتهاك حق المولود فى الحياه فبعد أن تلد الزوجه سوا كان ولد أم بنت كان يؤتى بالمولود ويوضع تحت قدم والده فإن إلتقاه ورفعه إليه كان ذلك إعلانا بقبوله فردا جديدا فى الأسره أما إن أعرض عنه فكان ذلك بمثابة نهايته فكان يلقى فى البحر أو يدفن

وعند العرب قبل الأسلام كان منتشرا قتل و وأد البنات حيث كانوا يعتبرونها وجها للفقر إلى أن جاء الأسلام وحرم ذلك

كده شفنا قد إيه المصريين القدماء كانوا بيعلوا من حماية حق الأنسان فى الحياه .. نشوفكم قريب فى بوست جديد وحق جديد من حقوق الأنسان فى مصر القديمة

أه يا حكومه ماتنفعنيش بتاخد رشوه وبقشيش

https://i1.wp.com/news.sky.com/sky-news/content/StaticFile/jpg/2010/Mar/Week4/15580831.jpg

أه يا حكومه ماتنفعنيش بتاخد رشوه وبقشيش

بييب بييب بييب بييييييييييب

وسع ياعم .. الكلام عن مرسيدس ورشوتها

نقول من الأول

الحكايه بكل بساطه وبكل سهوله

طلعت علينا شركة مرسيدس فى شهر أبريل بفضيحه عابره للقارات ماكنتش كدبة أبريل دى كانت وكسة أبريل

الشركه بسلامتها متورطه فى قضية رشاوى لمسئولين كبار داخل وخارج أمريكا لتوسيع عملها وأنتشارها وكدهون

فى منطقتنا الفاضله الشرق أوسطيه معانا فى حسبة الرشاوى تركيا والعراق .. طب العراق ماشى سداح مداح لأمريكا وشركاتها وكمان مش حنجيب سيرة تركيا خلينا فى بلوتنا إحنا

رحنا على الشركه إللى بترشى وتدى قالتلنا مالكومش عندى معلومات

وكمان نفس الكلام قالته وزارة العدل الأمريكيه

قالولنا هاتوا هيئة تحقيق قضائى تطلب إسم المرتشى وإحنا ندهولها

أصلهم قالوا إنه مسئول كبير ووضعه حساس

وفى بلدنا طبعا سكتم بكتم على إللى حصل اللهم إلا نائبنا العام طلع “لزوم حفظ ماء الوجه” وقال حنطلب أسم المرتشى وبعدها رجع سكتم بكتم تانى وأتضح إنه مش نائب عام ده يا نايم يا عايم

ونامت القصه تانى وأتعرف إن مرسيدس بنز جابت لمصر سيارات أسعاف جديده فى 2002 وإنها أحتفلت أوى أوى أوى بتوسيع سوقها فى بلدان وأسواق جديده .. بيقولك هى دى تقريبا موضع الرشوه

وبرضو النظام والقضاء والمجتمع والناس نايمين ساكتين مطنشين .. ع الترتيب

طب وبعدين حنفضل ساكتين كده .. ماينفعش

ما إحنا عايزين نعرف مين المرتشى ده وإيه تفاصيل الرشوه دى

ما أحنا عارفين إن كل الحكومه – أه كلها – مرتشين وفاسدين بس أهو عجل وقع وعايزين نثبتها عليه ونكتر سكاكينه

ولازم يتعرف هو مين ويتحاكم محاكمة عادله ونزيهه بس غير عادله ونزيه بتوع أكياس دم سرور الفاسده

ويطلع زى مايطلع يطلع وزير حالى حالى وزير سابق يطلع إبن وزير يطلع إبن رئيس – طبعا أقصد إبن رئيس مصلحه أو مؤسسه – مش حاجه تانى ماتودوناش فى داهيه الراجل بطل يحسس ويطبطب وأنا مش قده ولا قد أخوه وأبوه ولا حتى إمهم المفتريه

ع فكره الرشوه كانت 185 مليون دولار شوفوا نصيب حرامى حكومتنا كام بقى .. ربنا يخرب بيته

لما هى عصابه وسرقت السلطه عايزين الجيش يتحرك دلوقتى ليه

لما هى عصابه وسرقت السلطه عايزين الجيش يتحرك دلوقتى ليه

قبل ما أدخل فى البوست وده أصلا أول بوست فى المدونه دى .. أحب أقولك وبكل فشخره أنا مش بدافع عن الثوره أو بتعبير أدق مرحلة ما بعد ثورة 23 يوليو إللى هى بتبدأ من تانى يوم ثوره أصلا !!

مابسميهاش أنقلاب !! أينعم بقيت بعد كده إنقلاب على كل حاجه بما فى ذلك مطالب الثوره نفسها بس يوم 23 يوليو وما قبله من إعداد للثوره دى ماكنش أنقلاب ده كان تصحيح للأوضاع وثوره على الفساد

إللى بيقولوا إنها أنقلات على السلطه والشرعيه سلطة مين يا أبو سلطه سلطة الملكيه ولا فساد الملك وقيادات الجيش ، و شرعية إيه بالظبط شرعية التفرقه ولا الطبقات الأجتماعيه والفساد والخيانات ووو إللى كانت بتحكم البلد .. معاك إن الثوره بعد كده مالغتش الحاجات دى ده يمكن كمان رسختها أكتر بس كانت ثوره على الظلم ده مش إنقلاب عليه والظلم لو تم الأنقلاب عليه فده حق .

طيب نمشيها خمس دقايق إنقلاب وعصابة سرقة السلطه زى ما بتقولوا .. أومال بتطالبوا الجيش يتحرك تجاه مبارك دلوقتى ليه !!

مستنكرين غياب الجيش عن المعادله وبتطالبوا يكون ليه دور فيها ليه !!

بتحسبوا كل الأحتمالات وعايزين توصلوا للطرف إللى الجيش حيقف معاه ليه !!

هو أنتم فاكرين إن الجيش حيقدم حاجه جديده عن إللى قدمها بعد ثورة 23 يوليو

ده إللى عمله العسكريين بعد الثوره فينا وفى مصر هو النسخه الأرحم من تصرفاتهم

ولو جه الجيش والعسكر وحكموا تانى مش حيقدموا أحسن من إللى فات

لأن ده طبعهم ودى طبيعتهم

لو حتمشوها إنقلاب وعصابة سرقة السلطه والشرعيه فى 23 يوليو يبقى ماتستنوش أو ماتتمنوش خير من العسكر دلوقتى لأنهم حيبقوا أوسخ من ناصر ورجالته

أقله رجالة الجيش والعسكر زمان كانوا شايلين بندقيه دلوقتى بيزرعوا كاكا وكيوى وبيصنعوا فيديوهات وتلفزيونات وبيلعبوا كوره